波兰前锋罗拔利云度夫斯基转投巴塞後，立即交到货，西甲头4场攻入5球，仲有球「後脚拉西」靓波，不过佢必须保持咁好表现至得，因为巴塞当初喺合约中加入解约条款，就系如果第3年唔达标，合约自动解除。

西班牙《马卡报》报道，巴塞喺「罗拔佬」合约中加入一项条款，内容系去到第3年，如果上阵率低於55%，巴塞可於该季结束後单方面终止合约，唔会有第4年。

34岁嘅「罗拔佬」同巴塞签约4年，每年合约内容都唔同，首年税後年薪为1000万欧元，第2年上调至1300万欧元，第3年加到1600万欧元，最後一年降番落1300万欧元。至於奖金方面，西班牙盃冇奖金，只有西甲同欧联先有，西甲有30万欧元，如果赢晒西班牙盃、西甲同欧联，可得到100万欧元奖金。

如果「罗拔佬」顺利完成4年合约，到时佢都38岁，就算唔挂靴，相信巴塞都唔会同佢续约，不过以巴塞咁算死草，第3年高价卖走佢系绝对做得出。