周三(7日)凌晨欧联分组赛开打，G组英超豪门曼城作客以4比0大胜西甲球队西维尔，「蓝月亮」射手艾宁夏兰特又发威，个人梅开二度，成为曼城史上首位喺英超及欧联首次为球队披甲就入波嘅球员。

与此同时，呢位22岁挪威国脚职业生涯踢20场欧联累积入25球，成为欧联史上最快及最年轻入到25球嘅球员，劲过2位球王美斯同C朗。

曼城今夏签入艾宁夏兰特，填补中锋空缺，就系为咗争夺欧联冠军，佢亦不负所望，开赛20分钟近门铲入，为曼城打开纪录。

换边後，菲尔科顿射成2比0，之後呢位22岁英格兰国脚射门，被西维尔门将耶辛尼保奴扑出，艾宁夏兰特补射入网，加上中坚鲁宾戴亚斯补时近门撞入，送够4只蛋畀西维尔。

主角艾宁夏兰特今季各项赛事为曼城上阵8场轰入12球，入球率极高，佢亦成为欧联史上第4位为3支唔同球队入波嘅球员，另外3位系摩连迪斯、沙维奥拿、伊巴谦莫域。

艾宁夏兰特最犀利系仅踢20场欧联已入25球，成为赛事史上用最少场数入到25球嘅球员。值得一提，美斯出道後，踢首20场欧联仅入8球，C朗踢首20场欧联更加冇波入，更加反映夏兰特惊人潜力。

同组另1场，多蒙特凭马高列奥斯、拉菲尔古里路、祖迪比宁咸各入1球，主场以3比0击败哥本哈根。