周四(8日)凌晨欧联D组赛事，英超劲旅热刺主场2比0击败马赛，巴西前锋李察利臣足球生涯首次喺欧联上阵，即以2个头槌包办2个入球，完场後佢兴奋到揽住爸爸爆喊！

热刺今场继续由哈利卡尼同孙兴民担正，李察利臣就代替古路施夫斯基打正选，不过面对马赛都冇啖好食，上半场几乎冇创造任何攻势，半场闷和0比0。转捩点出现喺换边後1分钟，马赛後防赞素梅宾巴踢跌几乎单刀嘅孙兴民被逐，热刺踢多1个即加强攻势，去到尾段李察利臣喺76分钟同81分钟，两度接应队友传中顶入，顺利赢2比0。

李察利臣今夏以6,000万镑转会费加盟，今场先至拎到转会後第1个入波，佢完场後冲去场边嘅爸爸同朋友中间激动痛哭，热刺领队干地赛後表示：「我戥李察利臣开心，佢值得有呢一个夜晚，记得当初签佢嗰阵，佢话非常期待欧联嘅音乐奏起，今场我同佢讲机会嚟啦；李察利臣可以踢晒前锋3个位置，我哋对收购佢系从未怀疑。」