曾被誉为「新马甸尼」嘅意大利左後衞大衞辛顿，因为敌不过伤患，年仅31岁就宣布挂靴，实在令人婉惜。

曾经效力国际米兰、纽卡素嘅大衞辛顿，今夏约满离开罗马後，就冇球会收留，佢表示伤患问题系决定退役嘅主因：「近几年我受过太多伤，已经无法坚持落去，如果要继续踢波，恐怕要冒截肢风险，我嘅双脚仲可以用来行路，但无法再做职业球员。」据悉大衞辛顿右膝做过3次手术，连弯曲都有困难。

大衞辛顿属於国际米兰青训产品，18岁就为一队上阵，代表作一定系2009年2月欧联16强首回合成功冻结C朗，协助国米打和曼联0比0。大衞辛顿一战成名，并迅速晋身意大利国家队，被誉为「新马甸尼」。

不过，大衞辛顿之後事业发展一般，2011年转投纽卡素，2015年重投国米，4年前加盟罗马，只上阵53次有3次助攻。