周六晚英超好戏，纽卡素主场1比1逼和般尼茅夫。纽卡素今仗占尽优势，无奈破唔到客军密集防守，仲畀对方一次偷鸡领先，幸好凭新加盟嘅阿历山大伊沙克12码扳平，执番1分，至於般茅换帅後1胜2和不败，看守领队加利奥尼尔转正机会大增。

纽卡素贵为全球最富有球会，主场出击当然望赢波，佢哋自从开季战胜诺定咸森林後，近5仗4和1负，今场对新升班嘅般茅，一开波就狂攻，不过客队自从柏加被炒，由加利奥尼尔带队後，防守大有改善，今场顶住纽卡素攻势，又过一关。

上半场纽卡素全力抢攻，无奈过唔到般茅门将尼图十指关，完半场前祖连射门又中柱唔入，半场保持和局，直至下半场62分钟，般茅一次偷袭得手，菲腊标宁埋门建功，般茅捱打之下反而领先1比0。

落後嘅纽卡素继续强攻，终於搵到机会，谢法臣拿马拦截对方传中球省中手，球证翻睇VAR後认为手部动作唔自然，判罚12码，阿历山大伊沙克操刀为纽卡素扳平1比1完场。