英超球会白礼顿周一(19日)凌晨宣布，意大利籍教头迪萨比正式签约4年，将会取代转教车路士嘅朴达成为球会新帅。迪萨比嘅英超之路唔易行，头2场赛事就系作客利物浦同主场对热刺，喺世界盃前仲要对曼城、车路士以及英联盃对阿仙奴，绝对系一大考验。

43岁嘅迪萨比喺2018年至2021年执教萨斯索罗成名，佢为呢支小型球会注入控球踢法，连续2季意甲第8名成绩已经超额完成，呢个亦系白礼顿今季嘅目标。迪萨比上季执教乌克兰劲旅萨克达，但因「俄乌战事」爆发，今年7月份提前解约，令白礼顿可以顺利同佢签约4年。

白礼顿主席布隆表示：「好开心迪萨比愿意加盟，佢嘅球队踢出令人兴奋同刺激嘅足球，我好有信心佢嘅战术好适合白礼顿现有球员。」白礼顿今次招揽迪萨比同佢嘅意大利教练团队，全部都需要申请工作证，不过英超依家国际赛休战，喺下场对利物浦前有足够时间完成手续。