无缘今届世界盃决赛周嘅意大利谷底反弹，打入明年6月举行嘅欧国联4强争标战，「蓝衣兵团」最大收获系终於再出现1位传统金童型球员，佢就系22岁新星拉斯柏度尼。呢位效力拿玻里嘅前锋连续2场欧国联入波，成为球队晋级大功臣，更巧合系拉斯柏度尼同传奇名宿巴治奥都系2月18日出世，难怪被捧为「巴治奥传人」，肩负意大利复兴希望。

意大利足球盛世时期往往有1位「9号半」金童孭飞，包括巴治奥、迪比亚路、托迪、卡斯辛奴，但呢类天才型球员近年却喺意大利国家队绝迹，直至拉斯柏度尼横空降世，再次令「意粉」睇到金童影子。

出身於萨斯索罗嘅拉斯柏度尼2年前已崭露头角，上季意甲上阵36场入10球，今季被拿玻里以先借後买方式签入，有机会踢欧联，并喺对格拉斯哥流浪，射入1球，拿玻里现时排意甲及欧联A组榜首，拉斯柏度尼功不可没。

身高仅1米72嘅拉斯柏度尼同传统金童一样，都系个人技术出众，可以胜任中锋、第2前锋、左翼，佢喺早前欧国联对英格兰，以一下高难度控球，再射入对手大门，技惊四座，上仗对匈牙利，把握对方防线犯错射入，属於典型可凭个人力量改变战局嘅星级射手。

拉斯柏度尼自2021年6月4日首次为意大利上阵以来，已经有5球进帐，成为同期入波最多嘅意军球员。恩斯治尼曾经被批评冇资格着意大利10号球衣，拉斯柏度尼以行动证明，自己有能力成为意大利10号新主人。