意大利捧完上届欧国盃冠军後，迅速衰落，唔止无缘今届世界盃决赛周，更加陷入青黄不接危机，当中以锋线最严重，领队文仙尼今次欧国联，焗住补选已经5年冇为国家队上阵嘅加比亚甸尼，可见情况非常恶劣。

今季表现大勇嘅拿玻里翼锋保列坦奴受伤退队，文仙尼补选30岁嘅加比亚甸尼，令人大感意外，因为呢位森多利亚前锋已经缺席国际赛5年，而且长期表现低迷，职业生涯只有1季联赛入波达双位数，上季意甲上阵18场入得6球，被球迷嘲讽系「哑火前锋」，补选佢可以对国家队有几大帮助，实在令人怀疑。

其实意大利并非冇其他优秀进攻球员，但文仙尼却拒绝选入「首都孖宝」尼高路辛尼奥路、萨卡尼，两人被誉为近年意大利球坛少数天才横溢球员。据悉文仙尼弃用两人，系因为不满佢哋纪律欠佳，宁愿拣「哑火前锋」都唔要「天才坏孩子」。