国际赛开打，除咗多场欧国联，仲有其他热身赛，今届世盃决赛周32强当然有波踢，今次各国领队点样拣人，唔多唔少都反映到嚟紧世盃嘅基本班底。今届世盃大军增至26人，比以往多咗3个，呢3个名额就成为好多国家队边缘人争取嘅位置，希望一尝参战这个4年一度盛事嘅滋味！

英格兰有「幸福的烦恼」

英格兰2018年杀入世盃4强，旧年欧国盃更勇夺亚军，「三狮兵团」人才辈出，领队修夫基有「幸福的烦恼」，今次欧国联点兵，效力宾福特嘅前锋艾云东尼首次获得徵召，佢当然会把握今次机会表现自己。

马古尼梳尔资格成疑

其实英军中前场都有唔少边缘人，纽卡素前锋哥林威尔逊系其中1人，佢因为受伤先至落选今次大军，但「喜鹊」领队艾迪侯域认为呢名为球队上阵3场入2球嘅射手，值得拥有第5顶英格兰喼帽出战世界盃。另外，阿士东维拉前锋奥尼屈坚斯、今季转投森林嘅连格、曼联嘅查顿辛祖等，都要为世盃努力。

後防方面，修夫基继续拣晒4个右闸，阿历山大阿诺特、列斯占士、基尔获加及捷比亚，同位置嘅占士祖斯甸因为今季李斯特城嘅成绩，要争一席位真系要加倍努力。英军後防仲有一个谈论点，喺曼联已经沦为大後备嘅哈利马古尼同劳基梳尔，仲系咪有资格成为英军世盃成员，唔少球迷都非常质疑，如果佢哋仍然无法喺余下两个月证明自己，修夫基真系点兜都冇用，焗住搵其他人顶替二人。

德国贝拿高卓普属潜力股

德国主帅费历克今次点兵冇乜新意，大部分都熟口熟面，而2014年世盃夺冠功臣马里奥葛斯及晓姆斯，虽获传媒造势但影都冇，最大惊喜系贝拿高卓普首获徵召，呢位有喀麦隆血统嘅20岁修咸顿中坚，身形高大制空力强，不过速度一啲都唔慢，出脚拦截快狠准，踢法颇有谢路美保定嘅影子。

虽然贝拿高卓普经验尚浅，但德国阵中除咗鲁迪格之外，一众中坚质素只属一般，无论为咗储备人才，抑或费事畀喀麦隆抢走呢只潜力股，费历克决定先下手为强，加上佢喺水准更高嘅英超打出名堂，只要喺呢两轮欧国联表现对办，好大机会带埋佢去参加世盃。

踢4後衞高辛斯冇运行

另一焦点系28岁嘅左翼衞鲁宾高辛斯，自从上年9月後再获徵召，佢喺上年欧国盃决赛周凭超强出击力，奠定主力位置。可惜，高辛斯过去1年饱受伤患困扰，上季季中转投国际米兰後表现一般，直到今季比列锡离队後先攞番正选，依家喺「日耳曼兵团」已畀大衞拉林後上夺位，同时泰路基拿亦可兼任左闸，何况高辛斯一向攻强守弱，要展现佢锐利嘅助攻，最好系采用343阵式出任左翼衞，若果沿用4人防线，佢打左闸就变得平庸，能否出战世盃真系五五波，好视乎费历克点用佢。

法国人才济济基奥特冇碇企

上届世界盃冠军法国人才济济，唔少喺球会表现独当一面嘅猛将，要争取入选最後大军名单，参加今届决赛周亦非易事。强如身为法国队史上入球第二多嘅前锋基奥特，亦要为1个席位搏老命。

即将36岁嘅基奥特上季意甲攻入11球，协助ＡＣ米兰夺得联赛冠军，今季仍然系主将。不过呢位射手始终年龄已大，加上另1位锋线老将宾施马，基本上肯定入选，法国主帅迪甘斯为免球队太老化，随时会牺牲基奥特，将位置畀年轻球员。加上基奥特曾经传出同法国「天王」基利安麦巴比不和，亦系佢争取入选一大障碍。

普巴养伤中场新势力崛起

至於上季法甲有25球进帐嘅摩纳哥前锋宾耶达，以往都系边缘国脚，急需要把握未来1个多月时间，全力争取表现，希望迪甘斯睇中佢。

另外，由於保罗普巴养伤，古安杜斯、卡马云加等新一代中场势力趁机崛起，争取填补空缺。防线方面，今季喺阿仙奴有出色表现嘅21岁中坚威廉沙列巴随时可以後发先至，取代受伤嘅拜仁中坚乌柏美卡奴嘅国家队位置。

西班牙阿辛斯奥欠竞争力

西班牙主帅安历基一向系性格巨星，上年出战欧国盃决赛周大军名单，竟然一个皇马球员都冇。虽然近期已重召「舰队」成员，包括翼锋马高阿辛斯奥，但佢今季喺皇马上阵时间少得可怜，仲喺对马略卡之役未获披甲後发脾气，返回後备席全程黑面，因为佢深知继续咁落去，年尾世盃随时冇佢份。

尽管神童安素法迪未获重召，不过有毕尔包20岁小将尼高威廉斯首度入选，而且费伦托利斯及沙拉比亚都系稳胆，翼锋位置僧多粥少，阿辛斯奥需要用表现打动安历基。

艾利斯亚斯有望掹车边

除此之外，贝迪斯29岁箭头保查艾利斯亚斯首获徵召，佢今季已入咗4球，作为艾华路莫拉达副手，佢反而冇乜竞争对手，只要交足货，呢位大器晚成嘅前锋或可迟来先上岸。

荷兰VDB韦拿杜姆听天由命

荷兰阔别8年重踏世盃舞台，尹戈尔心目中已有一班基本人脚，边缘球员想要突围入选最後名单，都要施展浑身解数，既要喺所属联赛踢出佳绩，又要入到尹戈尔法眼，真系好难。

转投曼联後沉晒

云迪碧克（ＶＤＢ）可以话系最无希望嘅边缘国脚，可以讲系畀曼联害死，加盟曼联之前嘅佢天才横溢，最近做埋伯金女婿，背景雄厚，不过自佢转投「红魔鬼」後即被投闲置散，去年落选欧国盃名单，尹戈尔上任後曾召佢归队，不过去年9月对挪威後已经再冇入选，呢位25岁中场无论外借爱华顿定今季重返曼联都好沉，曼联新帅坦哈格谂紧办法帮佢。

另一大将韦拿杜姆亦要听天由命，佢系2014世盃荷兰季军队成员，更系橙军副队长，可惜喺8月中刚加盟罗马操练期间胫骨骨折，佢想去卡塔尔，可能要医学奇迹先得。尹戈尔领军期间，其实仲选过卢克迪庄、当耶尔马伦、哥尔尼维特几位射手，佢哋想入选最後名单，睇嚟要加把劲。

葡萄牙狼队球星轮住上

葡萄牙近年人脚班底比较稳定，以「曼市双雄」球星做骨干，其实另一支英超球队狼队都有唔少葡国球员，由於佢哋效力细球会，名气较低，必须付出更大努力，先至可以吸引葡萄牙主帅费兰度山度士注意。

狼队前锋柏度尼图、干卡路古亚迪斯实力都唔错，无奈锋线上有C朗、祖奥菲历斯、迪亚高祖达、拉菲尔利亚奥等球星，柏度尼图、干卡路古亚迪斯要争入国家队踢世界盃，困难重重。

要同C朗拗手瓜

中场方面，狼队嘅马菲奥斯纽尼斯、利物浦嘅法比奥卡华路近年迅速冒起，但大赛经验不足，依家就睇费兰度山度士愿唔愿意畀机会佢哋。

至於防线上，曼联後衞达洛治过往喺国家队上阵机会少，但随住佢今季成为红魔鬼主力，或者会获得费兰度山度士信任。狼队右闸尼尔逊施美度可能系达洛治最大竞争者。

巴西中前场人满之患

巴西被称为「足球王国」，人材鼎盛程度够拣3、4套星级阵容，中前场更加系「重灾区」，大量一线攻击球员争逐国家队席位，除咗尼马地位稳如泰山之外，其他球员都唔敢肯定自己一定可以入围！

巴西今次国际赛点兵，效力阿仙奴嘅加比尔捷西斯同加比尔马天尼利意外落选，但入选嘅同样粒粒皆星，李察利臣、云尼斯奥斯祖利亚、洛迪高高斯、罗拔图法明奴、安东尼马菲奥斯、拉芬夏比洛尼个个独当一面，以上球员除法明奴之外，个个都系21岁至25岁当打之龄，实力同级数不相伯仲，边个可以入围就睇嚟紧1个月嘅表现啦。

丹尼尔仲想踢埋今届

相比之下，巴西防线嘅选择唔算多，焦点落喺39岁右闸丹尼尔身上，呢位前巴塞隆拿球星一直强调想最後一次出战世盃，今个夏天转投墨超普马斯保持状态，希望可以获得国家队垂青。