巴黎圣日耳门上仗被兰斯逼和0比0，基利安麦巴比赛後喺社交网发帖，标题有「巴黎」同「柱趸式」等字眼，此帖好快删去，但法国传媒一睇就明，原来「麦总」又唔满意，暗示PSG开空头支票，究竟系咩唔满意呢？

法国《队报》解画，报道指麦巴比对於自己现时球队所踢嘅位置好唔满意，原来佢当初续约时，会方答应过会签入一位柱趸式中锋，而佢就可以喺前场随心所欲。

麦巴比希望PSG攻击线可以仿傚法国队，前锋线有一位类似宾施马或基奥特嘅中锋，佢就喺中锋身後活动，但结果会方并无签人，反而「麦总」要负责球队嘅9号位。

对兰斯一战，美斯缺阵，尼马於下半场中段落场，麦巴比孤军作战，加上沙治奥拉莫斯上半场末段被逐，结果被对手闷和，「麦总」赛後就发咗呢张帖。

PSG新任体育总监甘波斯承认，会方今夏曾努力物色中锋，施卡马卡、罗拔利云度夫斯基都系目标，结果都系一场空，令到「麦总」更嬲嘅系，美斯同尼马都冇固定位置，可以自由活动，而佢就要做柱趸，搞到好唔开心。