曼城将於周日(16日)晚英超作客利物浦，大战前夕，「蓝月亮」收到好消息，主将菲尔科顿正式续约5年，正好为球队振奋士气。呢位22岁英格兰国脚近2次英超去到晏菲路球场斗利物浦，都取得入球，堪称「红军克星」，星期日等睇佢表演啦。

曼城官方宣布，同菲尔科顿续约至2027年，据悉人工三级跳，由原本6万镑周薪大幅增加至20万镑周薪，但并非特别高，仅排队内第6位，甚至只及奇云迪布尼一半。

不过，菲尔科顿仍然觉得非常兴奋，话决定续约系一件好简单直接嘅事：「我同家人都感到好骄傲，根本唔使考虑，直接就答应续约，我希望为球队获得更多胜利，入更多波，今季我想提升入球数字，目前情况唔错。」

菲尔科顿今季各项赛事为曼城上阵13场入7球，已等於上季一半入球数字，好大机会创出个人单季入波新高，代表作一定系10月初「曼市打吡」射入3球，协助曼城大胜曼联6比3。

菲尔科顿9岁加入曼城青年军，近4季都有出色表现，被誉为「蓝月亮」最成功青训球员。虽然佢主要踢翼锋，但话有兴趣转踢中场指挥官位置，备受睇好将来接替奇云迪布尼，成为球队中场大脑，因而有「曼城太子」之称。

菲尔科顿仲系「红军克星」，7次对利物浦，射入3球及2次助攻，其中近2次英超作客晏菲路球场都有波入，包括上年2月曼城大胜利物浦4比1，科顿入1球及1次助攻。周日(16日)晚英超菲尔科顿再次去到「福地」晏菲路球场比赛，随时又有收获。