周日(16日)凌晨英超瞩目大战，热刺主场以2比0击败爱华顿，创下球会近59年最佳开季成绩，不过欢欣背後亦要付出沉重代价，巴西前锋李察利臣下半场小腿受伤，换走嗰阵一度激动落泪，完场後亦被影到要揸拐杖行路，周四(20日)凌晨作客曼联几乎肯定缺阵，更有可能缘尽卡塔尔世界盃决赛周。

热刺上半场同爱华顿势均力敌，客队曾有2次半单刀机会都射高，换边後7分钟热刺前锋李察利臣小腿受伤，佢亦知道伤势唔轻，被换走嗰阵忍唔住落泪。热刺改踢3-5-2後反而搵到入波，58分钟比克福特救波甩手，情急下再扑跌哈利卡尼输12码，哈利卡尼亲自操刀射入，完场前4分钟贺积查治再为热刺入波，锁定2比0胜局。

热刺赢波後升上联赛第3位，开季头10轮有7胜2和1负成绩，系球队自63/64球季後同期最高分数，但李察利臣嘅伤患情况就成为赛後焦点，热刺领队干地赛後表示：「我唔知咩情况，佢星期一(17日)会做MRI，希望今次小腿伤患唔系好严重。」

据报李察利臣受伤後喺更衣室情绪激动，冷静後就拎住拐杖受访：「上次我喺爱华顿小腿受伤，休息咗2个月，喺呢个时间发生系好难接受，世界盃只系得番1个月，我已经做好晒准备，好不幸突然出现伤患，我会保持乐观等待检查结果。」

李察利臣一直系巴西国家队前锋首选，佢喺近6场国家队赛事入7球，同尼马成为前锋最佳拍档，而且上年仲带领巴西赢到奥运男足金牌，地位崇高。如果李察利臣受伤，阿仙奴前锋加比尔捷西斯会系热门替补人选。