周四(20日)凌晨英超赛事，车路士作客宾福特只系闷和0比0，「蓝战士」已连续第5场比赛0失球，只可惜一众攻击球员表现差劲痛失2分。今场战情颇为沉闷，不过完场後两军主帅法兰克同朴达互相「质问」，反而非常精彩。

赛後嘅领队访问环节，Amazon Prime主持罕有安排两队主帅互相提问，宾福特领队法兰克就唔客气，直接到肉咁问朴达：「点解你个阵成日都转？」朴达回应：「好问题！我系根据每场比赛唔同需要而排阵，例如对手嘅战术等等，我希望就算用唔到战术，都可以保持良好嘅特质。」

之後轮到朴达发问，但佢嘅问题就明显Hea得到，只系问法兰克觉得英超同英冠最大分别系乜。唔少网民都大赞电视台今次「领队互问」嘅安排，认为之後嘅赛後访问都应该用呢种形式，而网民亦一致认定，法兰克做记者嘅功力比朴达优胜。