周四(20日)凌晨英超快车，曼联主场踢出今季代表作，全场28次埋门下2比0轻取热刺，不过C朗拿度「又」作反，就为呢场漂亮胜仗蒙上污点。呢位葡萄牙球星不满未获派上阵，竟然未完场就擅自返更衣室，领队坦哈格赛後表明会追究，话庆祝之後「处理」呢次事件。

曼联上场0比0闷和纽卡素，正选上阵嘅C朗表现低沉，今仗坦哈格就改用拉舒福特担正，面对龟缩死守嘅热刺轻易控制战局，单系上半场就有19次射门，但安东尼马菲奥斯远射中柱，加上热刺门将洛里斯连环救出险球，半场只系踢成0比0平手。

换边後曼联终有收获，费特47分钟远射省中人改变方向弹入，69分钟费特射门被闩出不远，般奴费南迪斯第1时间熨射直飞死角。曼联完场前4分钟换入艾兰加同基斯甸艾历臣後，虽然当时仲有2个换人名额未用，但斋热身冇份踢嘅C朗，突然嬲爆爆自己走返更衣室，抗议未获派上阵。

C朗喺今年8月季前热身赛对华历简奴，已经试过提早10分钟离开球场，坦哈格之後公开批评呢啲行为「不能接受」、「破坏团结」。呢位荷兰教头赛後被问到C朗离场一事，佢就不悦表示：「我见到(C朗离场)，我冇同佢倾过，听日先至处理呢件事，今日我想享受球队嘅表现。」据西班牙《阿斯报》报道，C朗可能会被罚款或停赛处分。

C朗今次行为再引热议，唔少名宿都批评佢嘅行为，英格兰传奇前锋舒利亚表示：「我明白C朗嘅不满，但佢要睇更阔嘅画面，曼联今场表现非常出色，坦哈格唔用佢嘅决定系正确，因为曼联今场所有嘢都好好。C朗系世界最佳球员，弃用佢系艰难决定，但佢咁做只系令坦哈格更加为难。」