周六(22日)意甲，祖云达斯主场以4比0大胜安玻里，取得球队今季最大胜仗，中场拉比奥特表现大勇，个人梅开二度，呢位季初几乎被祖记放弃嘅「坏孩子」，近期专注踢波尽显身价，证明自己值得留队，同埋可以成为法国出战今届世界盃嘅新重心。

今季成绩大倒退嘅祖云达斯终於踢出霸气，开赛8分钟就由摩斯坚恩射入打开纪录，跟住古达度2次开出角球，分别由韦斯顿麦坚尼、拉比奥特顶入，加上补时拉比奥特射入空门，送4只蛋畀安玻里。

主角拉比奥特以往纪律欠佳，声名唔多好，祖记季初打算将佢出售畀曼联，但因为呢位27岁法国国脚要求薪酬太高，吓怕曼联，而未能成事。

拉比奥特转会不成，大踢争气波，10月初欧联主场对海法马卡比，射入2球，今仗联赛又梅开二度，今月已经2次起孖。值得一提，拉比奥特此前只曾喺2015年效力巴黎圣日耳门时期试过1场入2球。

拉比奥特状态大勇对於祖记固然系喜讯，同时亦有助法国争取衞冕今届世界盃，由於尼高路简迪已因伤无缘世界盃，保罗普巴亦正在养伤，能否参赛成为疑问，拉比奥特愈战愈勇，对於法国中场线绝对系一场及时雨。