阿根廷世盃前爆恐慌，巴黎圣日耳门(PSG)证实美斯跟腱发炎，将会缺席周日(6日)对罗连安特嘅法甲联赛，虽然消息话美斯嘅伤唔算严重，但依家距离世盃决赛周只系剩2个星期左右，任何伤患都会成为忧虑。

美斯喺上周中欧联对祖云达斯踢足全场，不过对罗连安特前突然传出受伤消息，幸好PSG指佢嘅跟腱问题唔算严重，今个星期内可以重投操练。阿根廷目前面临伤兵危机，保罗戴巴拿、迪马利亚同基斯甸罗美路都养紧伤，出战世界盃要同时间竞赛。

美斯缺席对罗连安特後，世盃前只剩对欧塞尔一场联赛，美斯早前亦透露对伤患嘅担心：「今届世界盃嘅时间同以前好唔同，就算系小小嘅伤患都可能令你踢唔到决赛周，见到保罗戴巴拿同迪马利亚受伤，好难令人唔担心自己都会发生呢啲问题。」