西班牙名将碧基日前宣布挂靴後，周日(6日)凌晨为巴塞隆拿最後一次喺鲁营球场出赛，佢以队长身份正选上阵协助球队2比0击败艾美利亚，最後更喺超过9万球迷热烈掌声中离场，为佢嘅鲁营球场生涯画上圆满句号。

今场联赛变成碧基嘅告别赛，35岁嘅佢赛前带埋2个仔一齐入场，队友亦全部着晒印上碧基名字嘅3号波衫，看台上亦有欢送碧基嘅巨大横额，电视更播出碧基嘅纪念片段。巴塞今场亦踢出水准，虽然罗拔利云度夫斯基上半场12码宴客，但仍凭奥士文尼迪比利同法兰基迪庄下半场入波，顺利赢2比0。

碧基今仗喺完场前5分钟被调离阵，等佢可以接受鲁营球场超过9万球迷嘅掌声送别，完场後一众队友亦将碧基抛上天庆祝。最後碧基向主场球迷发表感人言论：「我喺鲁营生、喺鲁营死，当我逐渐大，明白有时爱系要放手，我深信将来一定会返嚟呢度，我爱巴塞，所以觉得依家系时候离开。」