阿仙奴上仗英超以1比0击败劲敌车路士，领队阿迪达执教兵工厂150场比赛，赢咗87场，成为球队史上领军首150场最佳成绩主帅，阿迪达更豪言阿仙奴已具备夺冠能力。

阿仙奴今季英超13战取得11胜1和1负，领先第2位曼城2分，展现冠军相，主帅阿迪达功不可没，根据OPTA数据，呢位40岁西班牙少帅执教兵工厂150场，取得第87场胜仗。

以领军首150场计算，阿达达成为阿仙奴史上赢波最多嘅领队，第2位系云格同格拉咸，两人都系82胜。

阿迪达今场仲为阿仙奴创出一个纪录，就系令兵工厂成为英超史上首支作客击败车路士10次嘅球队，名副其实系「劏车专家」。

赛後阿迪达对於球队争冠感到乐观：「以现时情况来讲，我哋有能力争冠，但足球世界千变万化，今日同明日可能好唔同，只需享受当下，睇下曼城过去6年嘅成就，佢哋系世上最佳球队，有最好嘅领队，各项赛事都有稳定表现，必须尊重佢哋，我哋亦要变得更好，更有竞争力，现时成绩唔错，但仲有一段漫长旅程。」

世界盃举行之前，阿仙奴仲有2场比赛，包括英联盃主场对白礼顿，英超作客对狼队。