热刺上场联赛主场1比2输畀利物浦，近3仗主场1和2负，差劲表现连热刺球迷都顶唔顺，喺半场同完场向球队报以嘘声，不过呢个行为就令领队干地非常不满，表明如果热刺球迷继续咁样做，佢会考虑今季之後离队！

干地喺输畀利物浦後，讲到被自己球迷狂嘘一事，呢位意大利主帅话：「买飞入场支持球队嘅球迷系要尊重，但老实讲我好失望，过去1年球队已经有好大进步，但如果佢哋觉得可以捧盃，我嘅答案系『好难』，所以每个人都要明白同埋有耐性，否则(嘘声)会摧毁球员嘅热情同激情，呢啲都系我最重要嘅燃料，如果我得唔到呢啲燃料，到季尾我会再睇下点样做。」

干地同热刺嘅合约去到季尾就完结，续约谈判亦迟迟未有进展，而且今次已经唔系干地第一次威胁会离队，有传佢仍然希望重返意甲执教，目前喺伦敦亦只系住酒店，似乎未有长期留低嘅计划。