我哋知道巴西王牌尼马、西班牙球星碧基得闲会玩啤牌，但佢哋踢波先系世界级，玩啤只系娱乐，不过德甲呢边有位球员就相反，禾夫斯堡前锋麦斯古斯同时亦系一位职业扑克选手，日前佢喺世界大赛夺冠，赢得13万欧元同埋「金手镯」奖。

34岁嘅麦斯古斯曾入选德国国家队，上阵14场入4球，不过2016年因为玩牌输钱，不但遭禾夫斯堡警告，更因此被踢出国家队。

今季麦斯古斯在禾夫斯堡仅上阵5场，最近一次上阵系9月初，之後唔见佢落场，原来佢去咗玩啤，出战共413人参赛嘅世界扑克大赛，最终赢得WSOP手镯，以及134,152欧元，佢喺官方twitter表示：「我始料不及，终於赢得WSOP手镯，感觉好极！」

其实今次夺冠之前，麦斯古斯曾喺2017年出战扑克世界赛，结果取得亚军及11万美元，今次成绩更进一步。