车路士周六(21日)英超作客0比0打和利物浦，近5场联赛第4度失分，不过「蓝战士」球迷就非常满意，事关身价1亿欧元嘅新兵梅迪历粉墨登场，只系踢35分钟已经光芒四射，令质疑佢转会费嘅人都话「物有所值」，多位英超名宿对佢赞不绝口，谢拉特更形容佢系「新洛宾」！

22岁嘅梅迪历上星期由萨克达加盟，今场喺55分钟上阵威胁力大，包括2次成功扭波、3次成功拦截、92.9%传球成功率等突出数据，尽展速度同技术，车路士领队朴达赛後表示：「梅迪历喺单对单非常危险，可以喺前场创造机会，系嗰种令球迷睇到企起身嘅球员，我哋会帮助佢尽快适应英超。」

一众英超名宿睇完呢位乌克兰新星首演後，纷纷对佢投以信心一票，前车路士中场祖高尔话：「佢搞到利物浦风声鹤唳，又扭得又射得，呢35分钟令我好兴奋。」曼联名将加利尼维利表示：「睇咗佢10分钟，我知我唔会想喺球场对住佢。」

利物浦传奇谢拉特更将梅迪历同荷兰翼锋洛宾相比：「如果我系车迷一定好开心，佢真系有料，令我觉得好似洛宾，睇梅迪历控制个波同速度，车路士球迷会好兴奋。」

车路士日前再官宣用3,500万欧元签入燕豪芬翼锋马杜基後，锋线人脚非常鼎盛，梅迪历、马杜基、夏维斯、美臣蒙特、祖奥菲历斯、奥巴美扬、薛耶治、基斯甸普列锡、大衞科芬拿等粒粒皆星，有望重振雄风。