艾宁夏兰特上年夏天由多蒙特加盟曼城，签约5年，合约包含解约条款，等到2024年，其他球会只要出2亿欧元就可以买断呢位22岁挪威国脚。最新消息指，夏兰特同意废除解约条款，但条件系领队哥迪奥拿必须留队。

艾宁夏兰特嘅解约条款原本将於2024年生效，两大劲旅巴黎圣日耳门、皇马都有意届时出手收购佢，但依家夏兰特同意废除条款，意味其他球会如果想喺2027年夏天约满前签入夏兰特，就必须得到曼城同意，否则出几多转会费都系徒然。

不过，夏兰特并非无条件同意废除解约条款，如果哥迪奥拿今年离开曼城，佢嘅解约条款仍然会喺2024年生效，两位将帅命运可以话系绑埋一齐。

另外，曼城宣布同前锋祖利安艾华利斯续约至2028年6月，呢位23岁阿根廷国脚嘅周薪将增加至10万镑，佢今季为曼城上阵33次，射入10球及3次助攻。