英超劲旅曼联今季成为盃赛专家，周五(17日)凌晨欧霸盃16强次回合作客1比0击败贝迪斯，两回合合计大胜5比1晋级8强，被视为争冠大敌嘅阿仙奴更提前出局，令「红魔鬼」嘅夺冠之路更加畅通！

曼联首回合已大胜4比1，今仗作客只系半场出击，同贝迪斯互有攻守，祖亚昆同法度根柏利斯查上半场各有一次攻门中柱，曼联到56分钟先由拉舒福特打破僵局，佢喺禁区外右脚抽射直飞死角，带领曼联再赢1比0。

曼联最近4次出战欧霸盃都跻身8强，之前3次成绩系冠军(16/17球季)、4强(19/20球季)同亚军(20/21球季)，今届随住大敌阿仙奴出局，曼联亦被视为冠军顶头大热，祖云达斯、罗马同西维尔算系较强嘅对手。

拉舒福特今季状态巅峰，今仗入波系佢历来第25个欧洲赛入球，唔单止系曼联欧洲赛史上最年轻入25球球员，亦系英格兰最年轻喺欧洲赛入25球球员。拉舒福特今场超越C朗喺曼联嘅欧洲赛入球(24球)，排球会史上第6位，仲差1球就追到第5位嘅史高斯(26球)。