曼联争入英超前4目标迈进一大步！周一(17日)凌晨赛事，伤兵满营嘅曼联凭安东尼马菲奥斯1射1传，作客2比0轻取诺定咸森林，依家领先第5位嘅热刺6分兼踢少1场，前4席位相当稳阵。曼联领队坦哈格赛後大赞「安一招」已经够杀，大有荷兰名将洛宾嘅影子。

喺拉舒福特、华拉尼、利辛度马天尼斯等主力接连受伤下，曼联今场变阵出击，包括将右闸达洛治改踢左闸。「红魔鬼」今场攻势不断，32分钟安东尼马迪尔射门被扑出，安东尼及时赶到「执鸡」射入；曼联之後多次埋门都逃唔过基罗拿华斯五指关，直到76分钟安东尼推入中路，交出靓直线畀入楔达洛治射入，助曼联赢2比0完场。

由於纽卡素、热刺今轮联赛都输波，曼联赢波後得以喺呢场前4争夺战中弹出，依家喺踢少1场下，仍然领先第4位嘅纽卡素3分、抛离第5位嘅热刺6分，优势已经确立。曼联下场联赛将会作客近况低迷嘅热刺，如果赢埋就几乎可以开定香槟。

巴西翼锋安东尼打破自己14场联赛入球荒，佢经常被球迷批评「死左脚」，每次拎波只系得扣入中路一招，不过坦哈格就力撑爱将咁踢冇问题：「安东尼只右脚都OK，佢都可以落底线，不过入中路威胁更加大，就好似洛宾咁，好多球迷都话佢只得一招，但呢一招就劲到冇人挡得住！当然识多几招会更加难防，但安东尼同样可以加强自己擅长嘅嘢，我支持佢继续咁踢