英超争霸愈趋紧凑，榜首阿仙奴连续2轮喺领先2比0情况下失分，榜首优势几乎蒸发晒，依家只系领先踢少1场嘅曼城4分，但考虑到两队嘅状态同赛程，权威数据公司Opta嘅分析，预测阿仙奴捧盃机会只有34.4%，一致睇好曼城可以成功衞冕。

阿仙奴最後7场联赛硬仗连场，周六(22日)凌晨主场迎战修咸顿後，将会迎战一段「地狱赛程」，连撼曼城(作客)、车路士(主场)、纽卡素(作客)同白礼顿(主场)4支劲敌。据Opta嘅精密数据预测系统，今轮英超前阿仙奴捧盃机会系46.9%，略为落後曼城(53.1%)，但对韦斯咸再失分後，夺冠机会急跌至34.4%，曼城捧盃机会升至65.6%。

阿仙奴前锋加比尔捷西斯赛後表示：「我哋再次喺大好形势下失分，头20分钟踢得好好，但领先2球後就收晒油，呢啲情况喺争标球队身上唔应该发生。我哋冇时间去互相指责，一定要提升返自己水准，只有继续赢波，先有机会喺下个月处於争霸位置。」