周日(3日)凌晨意甲，拉素作客以2比1击败上季冠军拿玻里，爆出5.4倍冷W，兼终止对方开季2连胜走势。今夏以自由身从法兰克福加盟拉素嘅日本国脚鎌田大地射入致胜1球，亦系佢登陆意甲之後首次入波，尽显功架。

两军近期表现原本有天壤之别，拿玻里开季2连胜，拉素2连败，但今仗交锋战况却出人意表，拉素上半场30分钟由路尔斯阿拔图射入先开纪录，拿玻里好快由施连斯基远射入网扳平。

换边之後，鎌田大地建功，呢位27岁中场今季3场联赛都踢正选，今仗终於开斋。鎌田大地上季为法兰克福各项赛事上阵47场入16球，踢法极具侵略性，佢依家喺意甲取得「零的突破」後，相信入波陆续有来。

值得一提，拉素2个入波都来自菲腊安达臣嘅助攻，仲有萨卡尼、古安杜斯入波「食诈胡」，否则拉素唔止赢2比1。

至於拿玻里今场有61.2%控球率，但22次射门仅4次中目标，首席射手域陀奥森汉5次起脚都唔中目标。反观拉素全场6次射门2次中目标就入咗2球，攻门把握力成为胜负分野。