「足球王国」巴西盛产神锋，球王比利、罗马里奥、朗拿度、朗拿甸奴世代相传，尼马早前超越球王比利，成为巴西国家队史上入波最多球员，呢位3a1岁射手已完成壮举，加上转战沙特「养老」，预料国际赛生涯日子所剩无几。一旦尼马退下，综观「森巴兵团」现时锋线，缺乏独当一面射手，李察利臣更被嘲讽为「最废9号」，莫非巴西光荣传统从此「断缆」？咁又未必，因为巴西「人才库」仍然强大，一批潜力新星正在冒起，细数当中8大「尼马接班人」。

17岁恩迪克6亿登舰潜力惊人

恩迪克被誉为「新大哨」，自细已经展现「入球机器」本色，曾为彭美拉斯青年军上阵169场入165球，上年10月以16岁零2个月16日，成为彭美拉斯一队史上最年轻上阵球员。恩迪克虽然身材唔高大，但非常强壮，集技术、力量、速度於一身，因此被指踢法似巴西传奇射手「大哨」朗拿度。

恩迪克今季巴甲愈战愈勇，已经有5球进帐，佢表示自己踢波以斗志顽强见称，喜欢满场飞，比赛每分每秒都会尽全力，永不放弃，向对手後衞施压，偶像系C朗。结果引来皇马出手，同彭美拉斯达成协议，等2024年7月恩迪克年满18岁之後，就会正式签入佢，据悉转会费高达7,200万欧元（约6亿港元），足以证明佢潜力惊人。

「第5R」洛基费拉拿 美洲冠军进攻万能Key

巴西曾出现经典「4R」射手罗马里奥、李华度、朗拿度、朗拿甸奴，洛基费拉拿（Roque）被睇好会成为「第5R」，皆因呢位新星展现超卓进攻技术，可以胜任前锋、翼锋、进攻中场。佢曾协助帕拉尼恩斯打入上年南美自由盃决赛，今年率领巴西夺得U20美洲国家盃冠军，并以6个入球，同队友安迪利山度士并列射手榜第1位，现时已进身巴西大国脚。

洛基费拉拿年纪轻轻已经喺大赛发光发热，自然吸引各大豪门争夺，巴塞隆拿今年7月向帕拉尼恩斯「预订」洛基费拉拿，估计转会费为4,500万欧元（约3.8亿港元），准备将佢打造成罗拔利云度夫斯基接班人。据悉洛基费拉拿将於2024年正式加盟呢支西甲劲旅，签约6年。

山度士後上劲似足比宁咸

已进军英超嘅安迪利山度士，被誉为巴西新世代最佳球员之一，虽然佢嘅位置系中场，不过近乎全能嘅球技令佢可以取得大量入球，喺今年初举行嘅U20美洲国家盃，安迪利山度士就以6个入球成为赛事嘅并列神射手，兼且带领巴西赢得冠军，随即获车路士用高价收购，今个夏天外借去诺定咸森林，准备喺英超大放异彩。

安迪利山度士洞察球赛能力高，经常可以走到靓位，而且爆发力同技术一流，後上埋门成为最强武器，预计佢未来发展亦会愈踢愈前，类似英格兰新星祖迪比宁咸嘅方向，进一步开发进攻潜能。

巴甲高效杀手 李安纳度有望跟摩佬

山度士向来盛产顶级前锋，比利同尼马都系来自呢间巴甲球会，球队依家最炙手可热嘅前锋，就系20岁嘅马高斯李安纳度。17岁就为山度士一队上阵，马高斯李安纳度上季已稳坐正选，各项赛事加埋入21球，今季巴甲上阵20场入12球，速度、盘扭同射术都获得肯定，而且射程范围甚大，经常有中距离或远射入波。

虽然佢同山度士合约到2026年，不过罗马同曼联今个暑假都曾提出斟介，据报罗马好大机会喺明年1月将佢招揽。马高斯李安纳度未入选大国脚，但佢喺巴西U20入球效率惊人，上阵13场入15球，如果可以跟「摩佬」摩连奴搵食，有望继续进步。

拿斯文图左右开弓身价飙升

马菲奥斯拿斯文图11岁已加入保地花高受训，2020年获提升上一队，喺佢16岁6个月零3日首次获派上阵，喺巴甲赛和哥连泰斯2比2，创下里约球员最年轻上阵纪录，之後保地花高降班一季回升巴甲後，佢逐渐获得稳定上阵机会，上季为保地花高上阵37场，射入7球，保地花高喺巴甲排11位，佢今季喺州联赛同盃赛合共上阵9场入1球。

国家队方面，拿斯文图系巴西U20成员，上阵3场入3球，佢踢法特点系左右脚皆精，擅长中距离同远射，而且身价开始上升，目前市值约900万欧元，估计如果登陆欧洲，身价肯定会高几倍。

法兰卡天分拍得住「小云」

马菲奥斯法兰卡12岁就畀法林明高睇中邀入青年军，被视为继云尼斯奥斯祖利亚之後，该队所出产最具天分嘅新星，连皇马都关注佢，而法兰卡踢法上锺意走去两边，攞到波後会切入中路传送或射门，确系几似「小云」。

法兰卡喺2021年获法林明高提升上一队，上阵52仗入咗9球，亦随队夺得2022年自由盃同巴西盃，其中喺自由盃16强次回合大胜杜利马之役，首次登上自由盃舞台嘅法兰卡即有士哥，表现Sharp醒。法兰卡曾入选巴西U16，上年首度为巴西U20披甲，佢喺今夏转战英超加盟水晶宫，虽然依家养紧伤，但老帅鹤臣大赞佢潜质优厚。

轩历基19岁被邀去掘金

基奥云尼轩历基於彭美拉斯青训出身，2021年3月首次登场，出道首个球季已经捧过南美自由盃，过去3季为彭美拉斯上阵32场入2球，今夏以900万欧元转会卡塔尔班霸球队艾萨德，签约5年，今季亚冠盃不妨留意佢演出。

喺彭美拉斯时期，基奥云尼轩历基主要担任右翼锋或翼衞，踢法类似曼联嘅安东尼马菲奥斯，锺意喺右边切入中路起左脚射门，系一位边路杀手。

神童安祖路车仔抢先落订

安祖路加比尔被誉为新一代巴西神童，2020年10月，安祖路加比尔以15岁308日，为山度士一队後备上阵对富明尼斯，超越球王比利，成为山度士及巴甲第二年轻上阵球员。自此，安祖路加比尔嘅名字，开始喺巴甲不断出现，车路士於今年7月快人一步，以1300万镑收购，跟球队展开美国之旅後，借咗畀衞星球会斯特拉斯堡。

18岁嘅安祖路加比尔喺山度士上阵129次，射入5球及10个助攻，於10岁时已经显得成熟过人，不论速度、技术及脚力均比同龄球员为佳。虽然安祖路加比尔系左脚球员，但佢擅长踢右翼，可以切入中路狂轰，但同时亦可落底进攻，令人防不胜防。