卷入家暴丑闻嘅曼联前锋格连活特，今夏外借西甲嘅基达菲，足球生涯重新出发，上场联赛攻入628日後首个入球後，据报呢位22岁前锋有望重返国家队，不过唔系佢曾经有1顶喼帽嘅英格兰国家队，而系牙买加国家队。

牙买加领队贺基姆臣日前承认，足总有意邀请格连活特「转藉」：「我哋希望搵到最好嘅球员，如果格连活特可以搵番佢以前嘅水平，肯定会对牙买加有好大帮助。」事实上早喺2021年未发生家暴事件前，牙买加足总就曾邀请格连活特加入。

格连活特曾经1次代表英格兰出赛，而且仲系欧国联嘅「正式比赛」，不过国际足协条例容许，喺21岁代表原属国家队唔够3次嘅球员，仍然可以选择转换代表国家，而格连活特首顶喼帽系喺19岁拎到。牙买加过去曾经邀得米查利安东尼奥同迪马雷格雷等英兵入籍。