曼联同C朗拿度嘅转会角力已超过2个星期，呢位葡萄牙前锋系阵中唯一冇归队集训嘅球员，不过C朗喺葡萄牙就继续自己练习，周一(18日)喺IG又再贴出同前士砵亭队友施美度、柏沙奥一齐练波嘅相片，简单留言「完成练习」。虽然C朗拒绝归队，但曼联领队坦哈格就企硬，甚至表示唔排除会延长C朗张合约！

坦哈格周一喺墨尔本接受记者访问，话题当然离唔开C朗，对於C朗同曼联合约有续约1年条款，坦哈格表示：「我清楚知道合约有延长1年嘅条款，佢有可能喺今季之後继续留队，不过老实讲，我同曼联都签约3年，不过足球从来都系短视，我哋要确保一开始就成功，唔需要睇得太远。」

被问到C朗嘅归队时间，坦哈格表明情况并冇改变，唔肯定佢几时会返英国，但就相信C朗会令自己保持最好状态。更有趣嘅系，坦哈格话C朗系佢战术重要一员：「我向球员表达我嘅要求，一个顶尖球员绝对可以有贡献，而C朗就系曼联嘅顶尖球员，佢嘅足球生涯已经展示出佢无所不能，尤其C朗嘅入波系极之重要，你会围绕呢啲球员建立球队。」