法国《巴黎人报》报道，法甲冠军巴黎圣日耳门(PSG)仍然计划出售尼马，并曾经联络曼城，提出用呢位30岁巴西前锋交换曼城中场贝拿度施华，但曼城领队哥迪奥拿立即拒绝。

PSG想放走尼马，已经成为公开嘅秘密，但能够负担呢位巴西国脚天价人工嘅球会并唔多，曼城属於少数签得起尼马嘅大球会。

不过，当PSG提出用尼马交换贝拿度施华，哥迪奥拿立即反对，一来贝拿度施华属於曼城主力，哥帅唔想放走佢，二来尼马未必适合曼城嘅战术要求，冇必要作出咁大风险嘅交易。

加上尼马唔想离开PSG，并於7月1日启动条款，自续约至2027年，佢税後年薪高达3,000万欧元，令唔少潜在买家却步，PSG想甩开呢件「大包袱」，并唔容易。