英格兰女足喺今届女子欧国盃凭主场优势，踢出王者霸气，3战全胜轰入14球，攻力冠绝各队。「英女」2位前锋美迪、艾伦韦芝演出大勇，美迪以5个入球排射手榜第1位，艾伦韦芝喺国家队已累积入52球，只要下仗8强对西班牙女足，再入1球，就可以追平朗尼，成为英格兰国家队(男女足)史上最多入波球员之一。

27岁嘅美迪效力阿仙奴女足，佢喺今届女子欧国盃3场分组赛都有入波，包括对挪威女足，上演帽子戏法，协助「英女」大胜8比0。呢位「女子版哈利卡尼」入球率惊人，今年为「英女」上阵10次入11球，包括今届女子欧国盃有5球进帐，领先射手榜第2位嘅3位球员2球，好大机会夺得今届金靴奖。

至於33岁老将艾伦韦芝效力曼城女足，今届赛事有2球进帐，佢为「英女」上阵110场入52球，属於英格兰女足史上首席射手，并有望打破英格兰男足朗尼嘅国家队入波纪录(53球)。

艾伦韦芝谦虚话发梦都冇谂过打破朗尼嘅纪录，只系想尽力帮助球队，以「英女」目前强势，相信艾伦韦芝可以创造新里程碑。