阿仙奴新兵加比尔捷西斯喺近期热身赛表现大勇，球会食过翻寻味，准备再收购巴西球员，英国传媒指兵工厂睇中里昂中场卢卡斯柏基达，有望以3,400万镑转会费签入呢位24岁全能中场。

阿仙奴为咗重振雄风，争取下季英超打入前4位，今夏积极增兵，已签入2位巴西前锋加比尔捷西斯、马昆奴斯，以及葡萄中场法比奥韦拉，曼城左闸辛真高亦即将加盟。不过，领队阿迪达仍未满足，希望签埋卢卡斯柏基达。

卢卡斯柏基达出身於巴甲球队法林明高，曾经效力AC米兰2季，但表现平平无奇，2年前转投法甲球队里昂後，获得重生，合共上阵78场入21球。

呢位巴西国脚技术全面，可以胜任中场任何位置，所以获得唔少球会垂青，曾传出纽卡素有意收购佢，里昂开天索价要求6,800万镑转会费。

不过，法国传媒指卢卡斯柏基达身价为3,400万镑，加上阿仙奴属於传统大球会，相信佢应该乐意入「厂」，阿仙奴有望以呢个价钱买到佢。