今个夏天积极买人嘅热刺，周三(20日)宣布由米杜士堡签入21岁右闸迪积史宾斯，转会费总值高达2,000万镑，成为今夏第6个新球员。不过领队干地似乎唔太雀跃，转会後竟然自爆呢单收购系球会要求，并唔系佢嘅主意，迪积史宾斯可唔可以得到重用仍有待观察。

迪积史宾斯上季外借诺定咸森林表现突出，热刺就出1,250万镑加750万镑奖金条款，成功令米杜士堡放人，双方已经签约5年，但干地表示：「史宾斯系球会想做嘅投资，球会话想完成呢单交易，我就话OK，史宾斯好年轻亦展示出成为好球员嘅潜力，所以球会决定买佢。」

事实上，干地今夏组军偏向「即食型」球员，比列锡、赖恩科士打分别33岁同34岁，比苏马同李察利臣都系征战英超多年嘅正选球员，热刺目前已有艾马逊、马特杜靴迪同卢卡斯莫拉可以踢右翼衞，迪积史宾斯想争正选都有一定难度。