意甲劲旅祖云达斯宣布，同中场艾朗蓝斯解约，呢位31岁威尔斯国脚可以自由身转会，美职、土超都可能系佢下一站落脚地，但肯定搵唔番效力祖记嘅40万镑周薪肥约。

祖云达斯透过官方社交网，用简单13个字公布已经同艾朗蓝斯解约，结束双方3年宾主关系。绰号「死神」嘅艾朗蓝斯2019年夏天以自由身，从阿仙奴转投祖云达斯，由於免转会费，祖记当年大方向佢开出40万镑周薪肥约。

不过，艾朗蓝斯效力祖记期间表现欠佳，大部份时间担任後备，今年1月更被外借去苏超球队格拉斯哥流浪，可见教练阿里基早已经放弃佢。

值得一提，艾朗蓝斯早前喺祖云达斯基地，为球迷签名期间，有人拎1张用意大利文写住「解除合约」嘅纸畀佢签名，艾朗蓝斯都照签，依家真系成为事实。

据悉土耳其球队加拉塔沙雷有兴趣签艾朗蓝斯，佢亦有可能加盟美职球队FC洛杉矶，同威尔斯国家队队友加里夫巴利拍住上，仲有1个选择系转投意甲新升班球队蒙沙。