阿根廷勇夺世盃冠军，除「球王」美斯成为童话故事嘅主角外，门将达米安马天尼斯嘅表现同样赢尽掌声，获选为世盃「金手套」嘅佢，据报有意「抛弃」依家效力嘅阿士东维拉，转投有份踢欧联嘅顶级大球会，喺最高水平赛事展示身手。

达米安马天尼斯依家30岁，对一名门将嚟讲仍然算系後生，过去2年半效力阿士东维拉虽然有唔错表现，但实力有限嘅维拉莫讲话争夺锦标，就连踢欧洲赛都有难度，随住达米安马天尼斯依家成为世界冠军兼金手套，嫌弃维拉亦系人之常情，佢经理人高尼日前就暗示达米安马天尼斯有意转会。

高尼接受意大利媒体《TuttoMercatoWeb》访问期间表示：「依家有几间球会都需要达米安马天尼斯，踢意甲当然唔系问题，好明显达米安马天尼斯有崇高理想，就系出战欧联。」达米安马天尼斯喺2014年，曾经代表阿仙奴踢过2场欧联，之後就再同呢项最高水平球会赛事无缘。