车路士今季成绩令人失望，球队喺1月转会大展拳脚，周三(11日)官宣祖奥菲历斯外借加盟，呢位葡萄牙国脚会着11号波衫，不过车仔买1个就损失番1个，上场联赛对曼城伤出嘅翼锋基斯甸普列锡，膝伤严重将要休息「几个月」。

祖奥菲历斯将以外借身份效力车路士到季尾，佢签约後表示：「好开心可以加盟车路士，呢间系世界上最大球会之一，我想帮助球队达成目标，好期待喺史丹福桥球场上阵。」祖奥菲历斯将会着11号波衫，呢个号码之前系由德国国脚迪姆华拿所用。

不过车路士有得亦有失，上场联赛对曼城受伤嘅基斯甸普列锡，经检查後发现膝伤严重，领队朴达证实：「我哋预计普列锡要休战几个月，希望佢可以比想像中更早复出。」朴达表示另一受伤前锋史达宁仍接受治疗，只透露「佢可以比普列锡早踢」，但冇透露实际养伤时间。