曼联争标美梦受到双重打击！周四(19日)凌晨英超赛事，「红魔鬼」临天光濑尿作客被水晶宫逼和1比1，各项赛事9连胜走势断缆，依家落後榜首阿仙奴8分兼踢多1场。更加惨情嘅系，曼联中场核心卡斯米路今仗拎黄牌，将要喺下周一(23日)凌晨对阿仙奴嘅生死战停赛。

曼联今场补赛强阵出击，新加盟嘅荷兰前锋韦格贺斯正选上阵，作客嘅「红魔鬼」亦顺利控制战局，不过埋门命中率唔高，41分钟更被主队奥辛尼艾度亚迪射中门楣，直到43分钟般奴费南迪斯同基斯甸艾历臣美妙配合，前者轻松射入令曼联半场领先1比0。

换边後战况胶着，曼联喺70分钟换人加强防守打算保住胜果，点知就放生水晶宫，80分钟卡斯米路因粗野拦截被罚黄牌，亦系佢今季累积第5面黄牌，将要喺下场作客阿仙奴停赛，去到补时1分钟，水晶宫新星米高奥利斯主射罚球直入死角，曼联晚节不保被逼和1比1完场。

曼联领队坦哈格赛後表示：「战果令人失望，我哋喺关键时刻失波，如果我哋入到第2球就可以终结比赛，但足球场上1个时刻足以改变一切，我哋仍然需要学习。」卡斯米路停赛对坦哈格同样系重大打击：「卡斯米路系重要球员，亦系曼联可以喺呢个位置嘅一大原因，我哋需要更好嘅计划去填补空缺。」