英格兰近年涌现唔少新星，其中曼城右後衞列高路易斯、白礼顿中坚高维尔今季演出令人惊喜，英国《每日邮报》指英格兰国家队主帅修夫基一直关注2人表现，准备徵召佢哋出战3月欧国盃外围赛。

18岁嘅列高路易斯之前趁基尔获加养伤，获得曼城领队哥迪奥拿重用，佢亦不负所望交出好表现，上阵11次，并且喺上年11月欧联对西维尔射入1球，以17岁零346日成为欧联史上首次担任正选最年轻入波球员。

列高路易斯已证明自己有能力喺大赛立足，所以就算佢从未为英格兰U21上阵，修夫基都愿意破格将佢提升上大国脚。

至於19岁嘅高维尔本身属於车路士球员，佢上季被外借去英冠球队哈特斯菲尔德，打出名堂，今季外借去白礼顿亦有稳定发挥，球队能够排英超前列，佢功不可没。高维尔被指踢法似车路士名宿泰利，潜力非常优厚，相信将来可以成为英格兰防线主力。

英格兰将於3月踢2场欧国盃外围赛，对手包括意大利及乌克兰。