曼联同阿仙奴近日一齐派出球探，前赴西甲贝迪斯考察巴西小将路尔斯轩历基表现，两队势必又有恶斗。

22岁嘅路尔斯轩历基今季先由富明尼斯加盟贝迪斯，短短半季即展现天赋，22场交出3入球5助攻，上仗西超盃对巴塞隆拿交出2个助攻逼和2比2，只系最终互射12码落败无缘争冠。

曼联坦哈格同阿仙奴阿迪达同时睇中佢，近日派出球探到西甲赛场，密切留意该球员表现同动向，准备出手，根据《转会市场》估价，佢转会身价为1500万欧元，但依家受两大豪门关注，身价自然水涨船高。

其实曼联同阿仙奴曾於去年夏天交手，阿仙奴先斟介阿根廷後衞利辛度马天尼斯，但最终被曼联截胡，并成为红魔後防悍将，阿仙奴近日斟介梅迪克又畀车路士截胡，成日慢人一步，由於曼联今个冬窗冇预算，增兵只能借将，阿仙奴如果睇中呢位小将，可以先下手为强。