AC米兰今季受到「灭门」危机困扰，正选门将迈治兰养伤，2号门将达泰鲁辛奴表现欠佳，会方计划签入「替工门将」以解燃眉之急，有意借用现时效力意乙球队帕尔马「传奇门神」保方，意味呢位45岁老将有望再战意甲。

迈治兰今季意甲仅上阵7次就受伤长抖，36岁後备门将达泰鲁辛奴表现力有不逮，AC米兰近2场意甲失4球，加上意超盃被国米轰入3球，达泰鲁辛奴要负上唔少责任，A米想签入新门将，绝对可以理解。

不过，由於A米只需要「替工门将」，唔想出钱收购球员，之所以睇中保方，一来佢大赛经验丰富，接近退休年龄，唔介意轮换，二来早前意大利盃帕尔马对国际米兰，保方表现神勇，屡救险球，逼到国米踢加时分胜负。

经此一役，A米更加深信保方仲有能力应付高水平赛事，至於借用能否成事，就要睇帕尔马肯唔肯放人。