修咸顿依家喺英超沉沦榜尾，不过英格兰国脚中场禾特普斯仍然表现出色，今季已有5个联赛入波成为队中首席射手。「罚球王」禾特普斯今季已有2次罚球入波纪录，距离碧咸保持嘅英超纪录(18球)只差2球，禾特普斯亦承认：「好难唔去谂(破纪录)！」

禾特普斯月中对爱华顿射入致胜罚球，系佢第16次喺英超用罚球入波，随住纪录愈嚟愈近，禾特普斯表示：「呢个(破碧咸纪录)念头喺我脑入面出现得愈嚟愈多，愈系接近我就愈在意，我知你哋想听我亲口讲要破碧咸纪录，不过我更加想修咸顿有好成绩，个人成败排最後。」

曼城领队哥迪奥拿早前曾盛赞禾特普斯系「最佳死球专家」，佢依家只系28岁，相信佢仲可以喺英超踢多几年，好大机会可以取代碧咸成为英超史上「罚球之王」。