奥巴美扬早前被车路士剔出欧联大军名单之後，呢位33岁前锋离队已成定局，英国《太阳报》指车路士已经同FC洛杉矶展开谈判，愿意将奥巴美扬出售畀呢支美职球队。

车路士季初向巴塞隆拿签入奥巴美扬，好大程度上由於当时领队杜曹执教多蒙特时期，曾经同呢位加蓬国脚合作过，所以搵佢帮手。

不过，随住杜曹被炒，车仔新帅朴达将奥巴美扬投闲置散，上月初英超车路士主场对曼城，朴达曾经派奥巴美扬入替受伤嘅史达宁，但之後又将佢换走，令呢老将非常无瘾。

朴达早前公布出战欧联淘汰赛名单，剔除奥巴美扬，腾出位置畀新兵，可见已下定决心放弃佢。

美职转会窗由1月31日至4月24日展开，FC洛杉矶希望签入奥巴美扬代替挂靴嘅加里夫巴利，车仔唔介意放人。

不过，有传AC米兰都有意签入奥巴美扬，佢早前知道自己落选欧联名单後，就飞去米兰同家人见面，加上奥巴美扬出身於A米青年军，的确有可能重返母会，但如果佢想返意甲搵食，就要等到夏天欧洲转会市场重开先至可以成事。