C朗2019年效力祖云达斯期间，创下2米56头槌入波最高纪录，呢个纪录喺上轮意甲被拿玻里前锋域陀奥森汉超越，新纪录系2米58，高咗2厘米。

拿玻里上轮意甲以3比0大胜史柏斯亚，域陀奥森汉梅开二度，其中喺68分钟一次头槌攻门，呢位尼日利亚前锋门前跳顶，门将出迎都唔够佢高，卒之畀佢一顶破网，纪录显示佢头槌高度有2米58。

不过域陀奥森汉所破嘅只系C朗喺意甲头槌纪录，C朗最高头槌纪录系2012至13球季欧联皇马对曼联，当时佢嘅头槌高度系2米93，呢项纪录仲未有人破到。

讲起域陀奥森汉，近日有报道指正物色新中锋嘅曼联睇中佢，不过拿玻里标价极之高昂，今个冬窗曾叫价1.4亿欧元，曼联打算今夏动用1.07亿镑收购佢，同拿玻里目标价有一段距离。