曼联翼锋加拿祖今季迅速冒起，唔止引起西甲豪门皇马注意，有意签番佢，连西班牙国家队都计划由阿根廷手上抢走呢位18岁新星。根据英国《镜报》爆料，西班牙足总将再次力邀加拿祖入国家队，出战3月底欧国盃外围赛，并承诺立即畀佢上阵机会，到时「米已成炊」，阿根廷就无法再徵召呢位新星。

加拿祖喺西班牙马德里出世，妈妈系阿根廷人，佢有资格选择为呢两支国家队上阵。事实上，曾於马体会及皇马青年军受训嘅加拿祖，过去游走於西、阿小国脚之间，曾经为西班牙U18上阵3次，亦为阿根廷U20披甲5次。

阿根廷主帅史卡朗尼上年曾召入加拿祖参加集训，世界盃前夕，阿根廷出现伤兵问题，一度令人以为会补选加拿祖，但史卡朗尼最後却拣选效力美职球队阿特兰大联嘅泰亚高艾美达，令人大跌眼镜，加拿祖亦难免感到失望，令佢国家队前途再起波澜。

西班牙上年12月改由富恩迪执教後，呢位曾经担任西班牙U19、U21及U23嘅「青年军名帅」有意为国家队推行年轻化，认为将加拿祖收归己用，对於西班牙国家队未来发展好重要，至於加拿祖会唔会接受西班牙徵召，相信好快有答案。