葡萄牙国家队新帅马天尼斯公布上任後首份大军名单，已经去咗沙特阿拉伯搵食嘅38岁老将C朗仍然榜上有名，呢位前锋连续20年入选国家队，并且只要再上阵1场，就可以超越科威特名将艾梅达华，成为史上最多次男子国家队上阵球员。

C朗近年水准下滑，上年世界盃表现备受批评，但葡萄牙新帅马天尼斯仍然器重呢位球星，佢话：「C朗可以为球队提供经验，佢喺队内有好大威望，我拣人从来唔睇年龄，佢同其他球员都一样有入选机会，我希望葡萄牙年轻球员可以从C朗身上学嘢。」

C朗自2003年首次入选葡萄牙国家队以来，保持每年都有入选，至今已为球队上阵196次，同科威特名将艾梅达华并列史上男子国家队最多披甲球员纪录。

葡萄牙将於3月24日凌晨欧国盃外围赛J组主场对列支敦士登，3日之後作客卢森堡，如无意外C朗都会上阵，刷新纪录。