陷入降班漩涡嘅水晶宫，周一(10日)凌晨护级大战作客5比1大炒列斯联，出山救亡嘅领队鹤臣上任後2场抢足6分，比起前任领队韦拉喺2023年拎到嘅分数更多(12场得5分)！水晶宫近2仗入7球，亦等於球队之前15场联赛嘅总入球数，鹤臣果然有料！

水晶宫今场21分钟先失波，班福特为列斯联打开纪录，客队完半场前由马克古希追平。换边後水晶宫大开杀戒，伊比尔治伊斯、奥辛尼艾度亚迪同佐敦阿休(2球)分别入波，带领球队大胜5比1，小将米高奥利斯今仗助攻「帽子戏法」，成为赢波英雄。

水晶宫赢波後同降班区拉开6分，暂时松一口气，不过见惯世面嘅鹤臣就话：「我唔识得魔术，依家一切都好完美，就连天气都好好，不过我知道将来会有唔同嘅日子，我亦会面对唔同嘅问题，所以依家要好好享受呢个美好时刻。」