利物浦主场2比2逼和阿仙奴一仗，「红军」全场制造唔少入球机会，下半场更曾获得12码，当穆罕默德沙拿操刀嗰阵，领队高普紧张到拧转面唔敢睇，尴尬嘅系当沙拿射门连龙门都唔中，背向球场嘅高普竟「收错风」，做出握拳庆祝动作，到转身望番球场先知自己摆乌龙。

高普赛後回忆呢段瘀事：「我系事後先睇番呢个12码，当时我只系睇住球迷嘅反应，好明显有部份球迷以为入咗，所以我就庆祝，不过之後见到沙拿并冇庆祝，我就知道佢射唔入，件事就系咁。」相比乌龙庆祝，沙拿近5次主射12码3度宴客，最近2球更加连龙门都射唔中，刽子手问题更加值得高普关注。

被问到会唔会更换刽子手，高普亦唔排除换人可能性：「我会同沙拿倾呢个问题，但唔系喺呢度讲。」有传如果利物浦决定更换刽子手，巴西中场法宾奴会系头号人选，之前穆罕默德沙拿踢非国盃期间，法宾奴就系负责12码嘅球员。