曼城喺英超愈战愈勇，除艾宁夏兰特疯狂入波之外，中场发电机奇云迪布尼亦默默交出神级数据。对李斯特城交出嘅美妙助攻後，奇云迪布尼喺英超累积100次助攻，亦系史上第1个喺4季英超交出「15+」助攻嘅球员，认真犀利。

曼城今季风头畀艾宁夏兰特抢晒，但奇云迪布尼嘅重要性丝毫未减，佢今场交出今季第15次助攻、英超累积第100次助攻，系英超史上首个喺4个球季录得「15+」助攻球员，另外佢亦系杰斯(曼联)之後，史上第2个为同一球队贡献100助攻嘅英超球员。

虽然同艾宁夏兰特系第1年合作，但呢个「夏迪组合」已有化学作用，今仗3比0嘅入球，系奇云迪布尼各项赛事第10次助攻艾宁夏兰特入波，超越多蒙特时代嘅查顿辛祖(9次助攻)，成为艾宁夏兰特历来最大「入波供应商」，堪称系梦幻拍档。