纽卡素好大机会取得英超前4位，参加下届欧联，领队艾迪侯域开始制定今夏增兵名单，提升实力迎接呢项大赛。西班牙着名记者谢拉特罗美路爆料，指纽卡素愿意以破球会转会费纪录嘅7,100万镑(约7亿港元)收购巴塞隆拿翼锋拉芬夏比洛尼，联同阵中2位巴西兵祖连顿、般奴古马雷斯，组成「森巴铁三角」。

26岁嘅拉芬夏比洛尼效力列斯联期间，纽卡素曾经2次提出收购佢，但上年夏天被巴塞隆拿截胡，以5,500万镑(约5.4亿港元)收归旗下。不过，拉芬夏比洛尼去到西班牙後表现一般，巴塞已准备出售佢，作为舒缓球会财政负担嘅方法之一。

谢拉特罗美路指「新土豪」纽卡素趁机联络巴塞，愿意用7,100万镑买入拉芬夏比洛尼，巴塞短短1年已可赚1,600万镑(约1.58亿港元)，对於呢支陷入财困嘅西甲球队而言，绝对系一场及时雨。若然成事，就会超越上年夏天以6,300万镑(约6.2亿港元)加盟嘅阿历山大伊沙克，成为纽卡素史上最贵收购。

艾迪侯域之所以对拉芬夏比洛尼念念不忘，皆因佢效力列斯联期间表现出色，并已适应英超，可以「即食」提升球队攻力，拉芬夏比洛尼亦可以重返英超，拯救足球事业，绝对系双赢。