英格兰周三(24日)公布最新一期大军名单，准备6月份对马尔他同北马其顿2场欧国盃外围赛，今次点兵冇乜太大意外，史达宁落选成为焦点之一，不过球迷更加不满哈利马古尼同加云菲腊斯嘅入选，修夫基亦暗示今次上榜，可能系两人嘅「最後机会」，获重召嘅白礼顿中坚李维士邓克有望把握机会上位。

曼联嘅哈利马古尼同曼城嘅加云菲腊斯，今季大部份时间坐冷板，合共只系踢过863分钟联赛，但就踢走汤姆利、积及蓝斯、基比斯韦特等新星，修夫基解释：「佢哋都系英格兰重要球员，喺欧洲赛同国际赛有丰富经验，不过依家嘅情况(上阵机会少)唔可能永远维持，我哋有马克古希、李维士邓克同泰朗明斯等等踢得好，但冇太多大赛经验嘅球员上紧位，目的系要增加更多竞争。」

水晶宫中场伊比尔治伊斯系大军唯一未有喼帽球员，哥林威尔逊、李维士邓克等亦获重召，至於车路士前锋史达宁落选，修夫基就表明未来仍有佢嘅席位：「我几个星期前同佢倾过，佢觉得自己状态唔好，体能力有问题而且亦有伤患，但我会支持佢反弹，再次证明自己能力。」